ESPECTÁCULO MÚSICO-TEATRAL 'BENITO SOTO VOLVE DO ALÉN' DE OS DE ALGURES

“Os de Algures” presentan «Benito Soto volve do Alén», un espectáculo teatral que combina música tradicional, humor, historia e lendas populares de Pontevedra.
A representación conta coa colaboración especial da Aula Municipal de Teatro de Pontevedra e da Asociación de Danza e Teatro Cafuné, mentres que o vestiario corre a cargo da Asociación Etnográfica Sete Espadelas.
O director teatral: Anxo Lourido e o director artístico: José Luis Rodríguez, foron os encargados de artellar esta disparatada comedia.
O elenco está formado por trinta e cinco actores, actrices e músicos, que darán vida a unha comedia costumista e de enredo, ambientada nas tradicións e romarías pontevedresas.

Na noite de defuntos, o célebre pirata pontevedrés Benito Soto regresa do Alén acompañado da súa tripulación do Burla Negra, coa intención de recuperar o seu fabuloso tesouro agochado nunha moi coñecida casa pontevedresa.
Pero o que parecía unha misión sinxela convértese nunha sucesión de enredos, malentendidos e situacións disparatadas cando os piratas se atopan cos gaiteiros de “Os de Algures”, os taberneiros da Moureira e a mismísima Santa Compaña.
Entre cuncas de viño, negocios turbios, promesas incumpridas e ánimas con sede, vivos e mortos percorren algunhas das romarías máis tradicionais da contorna: a das Cabezas da Armenteira e a de San Brais, sen esquecer os remedios milagreiros de San Benitiño de Lérez.
A música de gaitas e a retranca galega acompañan esta aventura na que a cobiza, a picaresca e os costumes populares se mesturan nunha auténtica festa teatral. «Benito Soto volve do Alén» é tamén unha homenaxe á memoria popular de Pontevedra, ao seu patrimonio, ás súas tradicións e á maneira tan nosa de rirnos ata da propia morte.

Entrada libre ata completar cabida